პრემიერმა და სოფლის მეურნეობის მინისტრმა ზუგდიდის რაიონის სოფელ ზედა ეწერში ხილის საწარმო გახსნეს

პრემიერმა და სოფლის მეურნეობის მინისტრმა ზუგდიდის რაიონის სოფელ ზედა ეწერში ხილის საწარმო გახსნეს"1 400 000 აშშ დოლარის ოდენობის ინვესტიცია და კიდევ ერთი ახალი საწარმო სახელმწიფო პროგრამა „ერთიანი აგროპროექტის" ფარგლებში, - სუბლიმირებული ხილის საწარმო - "გემუანი" ზუგდიდის მუნიციპალიტეტის სოფელ ზედა ეწერში დღეს საქართველოს პრემიერ-მინისტრმა გიორგი კვირიკაშვილმა სოფლის მეურნეობის მინისტრ ლევან დავითაშვილთან ერთად გახსნა. საწარმოში, რომელიც წლიურად 250 ტონა სხვადასხვა სახეობის ხილის გადამუშავებას უზრუნველყოფს, 30 ადამიანია დასაქმებული.

პროდუქციის რეალიზაცია ხდება როგორც ადგილობრივ, ისე - საექსპორტო ბაზრებზე.

“საწარმოს წინასწარ აქვს შეკვეთები იმ პროდუქციის პრაქტიკულად 100%-ზე, რომელსაც მომავალი ერთი წლის განმავლობაში დაამზადებს“, – აღნიშნა დღეს მთავრობის სხდომაზე გიორგი კვირიკაშვილმა.

”გემუანმა” ხილის გადამუშავების ახალი ტექნოლოგია სახელმწიფოს, USAID/REAP-ის და ბაზის ბანკის დახმარებით დანერგა. ახალი ტექნოლოგიით, ქართული ხილი, სპეციალური წესით დამუშავების შედეგად, ინარჩუნებს ვიტამინებისა და მიკროელემენტების 98%-ს, ასევე ფერს, ფორმასა და არომატს.

კომპანიის საექსპორტო ბაზრები ახლო აღმოსავლეთი, არაბთა გაერთიანებული საემიროები და რამდენიმე ევროპული ქვეყანაა.

საწარმოს პროდუქციას 150-ზე მეტი მცირე და საშუალო ფერმერი აწვდის.

კომპანია, უახლოეს მომავალში, სოფლის მეურნეობის პროექტების მართვის სააგენტოსა და USAID/REAP-ის მხარდაჭერით, საერთაშორისო სტანდარტის - ISO:22000-ს აღებას გეგმავს.